खोनाया चिकं भिडियो नं राष्ट्रिय अनलाईन भिडियो कासाय् सोसियल मिडिया सिरपाः गथे याना त्याकल ?

– हरिनाथ डंगोल

यें या थापागाउँलय् च्वंगु मण्डला थियटरय् थौ नेपाल सम्बत ११४५ गुँलाथ्व दशमी सोमबा कुन्हु न्हिनेसिया २ः०० ता ई निसें सनिलया ५ः०० ता इलय् जुगु राष्ट्रिय अनलाइन भिडियो धें धें बल्ला ज्याझ्वःले न्हाप, ल्यू, लियांल्यू, हपाः व सोसल मिडिया लागु पुचःयात सिरपा लल्हागु ज्याझ्व जुल । उगु ज्याझ्वःलय् खोनाया चिकं भिडियोयात सोसल मिडिया सिरपा, दसिपौ व झिद्ध दां त्याकुगु दु ।
जिगु जिमेलय् पौ छगु वयाच्वन् । जिः ज्यायेगु लाछी रेष्टुरेण्टया ल्यापटप चायका स्वयाः । पौलय् भिडियो कासाया लिच्वः व सिरपा बिइगु दिं नापं ज्याझ्वःया खँय् एभ्नी सेन्टर फोर सस्टेनएबिलिटीं पाखें वयाच्वंगु । नापं ज्याझ्वःलय् “रैथाने ज्ञान अबको समाधान” खँय् मंका सहलह ज्याझ्व नं दुगुली भिडियो पुचःया सकल दुजः पिन्त नं ब्वति कायेगु खं नं न्ह्यथनातगु जुल ।
थ्व भिडियो दयेकेगु नितिं खोना चिकं साः पुचः नं यक्वः हे कुतः अले मेहनत यागुलिं पासापीं पाखें नं सिरपा त्याकीगुया आशा नं यागु दु । जिं त्रिभुवन विश्वविद्यालय स्नाकोत्तरय् व्यवशाय अध्ययन ९ः।द्य।क्० विषय क्वचायेकेतः सन् २०२३ सेप्टेम्बरय् थेसिस च्वयगु झ्वलय् खोनाया चिकं साःलय् ज्याः याइपिं साः ज्यामि, साम्वः अले साःपाः काया वयाच्वंपि साः उद्यमी नापं अन्तक्रिया याना साः व साःपा काइपिं ज्यामी पिनिगु गथेयाना अझ बांलाका यनेफइ धइगु खंय् तयार यानागु खः । थ्व भिडियो कासा तयार यायेत उगु थेसिसंनं लिधंसा बिल । भिडियो कासाया सूचं अले थुके व्वति कायेगु खंय् दकले न्हापां खोकना च्यानल व एच पि एस फोटो सेन्टरया विनोद महर्जन नापं खं ब्याका । फोटोग्राफी, भिडियोग्राफी नापं भिडियो इडिट यायेगु सीपय् यक्वः हे ज्याःसम्ह किजां नं थुगु खँ नापं सहमती जुल । अले उबले किजा विनोद नापं तुं हे ललितपुर महानगरपालिका वडा नं १६ पाखें स्टोरी टेलिङ्ग वर्कसपय् सयेकापि निम्ह पासापिं रवि महर्जन (गुम्ह ख्याली कलाकारिता अले निर्देशनय् यक्वः हे ज्याःसनी न्हयांम्ह) व अनिल नकर्मी (गुगुम्ह म्युजिसियन व इडिटर) नापं पुचः दयेकेगु खं कथं जिपिं प्यम्ह छन्हु लाछी रेष्टुरेन्टय् नापलाना खोनाया चिकं साःलय् वना थप अध्ययन याना । वया स्वन्हु लिपाः थ्व भिडियो स्क्रीप्ट फाइनल यायेतः अनिलजी या रेकर्डिङ्ग स्टुडियोलय् च्वना जिमिसं रवि महर्जन ज्यूं नं च्वया हःगु स्क्रीप्ट यात ल्ययेगु याना । नापं कलाकार थःपिं हे च्वना सुटिङ्गया व्यवस्थापन यायेगु योजना नं याना । लिपा कलाकार मध्ये म्हयाय, अबु व मा जुया दिइपीं विनोद महर्जनं पाखें हाकनं व्यवस्था याये फइगु खं न्हयथंगु कथं विक्रम महर्जन नापं खं ल्हना व्यवस्था याना । छसिंकथं यशोदा चन्द (म्हयाय्), विक्रम महर्जन (अबु) व पुनम महर्जन (मा) जुया ग्वाहाली यायेगु बचं कथं थप क्यामेरा व भिडियो कायेतः सुरेन्द्र लाल खोखालीजुयात नं नापं तु पुचःलय् दुथ्याका खोनाया गाबु ज्याःसालय् कान्छा महर्जन व साःया ज्यामिपीं, विनोदया छें जहान सनिता श्रेष्ठ व जलखलः सकलें पिनिगु ग्वाहाली कया छन्हु न्हिच्छि बिइका भिडियो खिचेयाना । थ्वया लिपा रवि महर्जन व अनिल नकर्मी ज्यूपिं निम्हेसिनं भिडियो इडिट व साउण्ड कम्पोजिसन मिलेयाना यक्वः हे ग्वाहाली यानादिल ।
अले थ्व कासाय् भिडियो नापं फारामे मु कथं स्वगु न्हयसः या लिसः अंग्रेजी भाषा च्वयाछ्यव मागुली जिं सकल पुचःयाके मंका कथं मूना विचा काया च्वया तयारी याना व ड्राफ्ट जुगु भिडियोयात फाइनल आउटपुट भिडियो तयार यायेतः एच पि एस फोटो सेन्टरया स्टुडियोलय् च्वना थप इडिट याना । व हे कथं जिं च्वयागु लिसः त नं छक्वः पुचःले ब्वना न्यने लिपा सकल दुजः पाखें इमेल पाखें व्वति कायेत स्वीकृत कया । थुगु भिडियो यात अझ नं बांलाकेगु मती तया खोनाया हरिभक्त डंगोल पाखें दयेका तगु खोनाया चिकं बन्जाया भिडियो छगु क्लिप नं स्वाःना थ्व कासाया भिडियो तयार याना । अले इमेलपाखें थ्व राष्ट्रिय अनलाइन भिडियो धें धें बल्ला कासाय् व्यति काया । थुगु कथं एभ्नी संस्थाया फेसबुक आधिकारीक पाखें ब्वति नं ५२ कथं दुथ्यात । अले सकलें दुजः नापं सकल नेपाःमी दाजुकिजा पाखें नं फेसबुक पाखें प्रचारप्रसार ग्वहाली याना दिल । जम्मा ६७ भिडियो सहभागी मध्ये २५ गू बांलागु भिडियोलय् थुगु छनौट जुया थौ सोसल मिडिया सिरपा नं त्याकुगु दु ।
अन्तय् जिमिगु पुचः पाखें सकसित दुनुगल निंसे सुभाय् दु । थुगु कथं झीसं थःगु थासय् हे दुगु पुलांगु ज्ञान, सीप व कला यात सृजनात्मक ज्याः याना दे व हलिमय् तकनं ज्या याये फइगु जुया च्वन । थःगु देशय् हे च्वंगु विश्वविद्यालय्ले व्वनेगु नापं ज्याः यायेयु कुतः यायेमाः । थन हे दुगु सीप, कला दुपिं व्यक्तित्वपिं म्हसिका, सहलह याना झिगु पुचः दयेका च्वनेमा । झीसं झीगु ज्याः, भाय्, कला, संस्कृतिया खंय् अझ नं छधी छप्पा जुया सकलें न्ह्यने वनेगु कुतः याना वने फुसा, झी सकल नेवाः व नेपाःमी पिनिगु धार्मिक, सामाजिक व आर्थिक रुपं जीवनस्तर अझ नं बांलाका वनी फुपिं जुयावनी । सकल सियां भिं जुइमा । सुभाय् ।।